II Día da ciencia en galego

Este ano foi declarado Ano internacional da Química pola UNESCO, polo que o día da ciencia en galego 2011 o dedicaremos á Química, á muller na ciencia e, tamén, homenaxearemos a María Curie e María Wonenburguer, unha matemática galega.

Se queres coñecer a súa vida podes consultala premendo aquí.

Únete e participa no II día da Ciencia en Galego ; na ligazón atoparás propostas máis detalladas, así como a solicitude de participación dos centros na Semana da Ciencia cun obradoiro de robótica en Lugo durante o mes de novembro.

Variacións sobre a lectura

Máis de 1100 persoas asistimos no Pazo de Congresos de Santiago ós III Encontros de Bibliotecas Escolares Galegas.

Todo o programa foi de interese, pero cabe destacar a conferencia de apertura a cargo de Teresa Colomer, responsable do equipo de investigación de GRETEL, da Universidade Autónoma de Barcelona. Co título "Unha infancia de 500 libros" propón para os rapaces un conxunto de lecturas "clásicas": o folclore, os títulos máis valorados da literatura infantil e o inicio á lectura das grandes obras patrimoniais.

Javier Celaya, socio-fundador do portal cultural Dosdoce.com e director de varios masters na Universidade de Alcalá, analizou os hábitos de acceso á información e a xestión do coñecemento a partir da aparición de internet.

Das experiencias de centros, cabe destacar polo seu interese a de Miguel Rico, do IES de Monterroso e a de Palma Aparicio, do IES Rey Pelayo de Cangas de Onís.

A organización, co esmero e o bo facer de sempre. Grazas por tanto e tan bo traballo.

Non clausura

Cando poidades, escoitade a Non clausura que fixo o ministro de Educación, Ángel Gabilondo, do congreso Leer.es

Pareceunos fermosa e diferente. Ao mellor este ministro cambia algunha cousa se lle deixan.

Mirade aquí.

Xornadas PROA

Fomos invitados a participar na Xornada do Programa PROA que se celebrou onte no CFP Monte do Conxo de Santiago; alí puidemos expor a experiencia da Hora de Ler e algunhas liñas do funcionamento da nosa Biblioteca.

O noso relatorio, titulado "Os recursos da Biblioteca do centro e a competencia lingüística", foi acollido con simpatía e interés por parte dos case douscentos asistentes.

Vaia para todos eles e a organización o noso agradecemento.

Participamos nas Xornadas

Como en anos anteriores, tamén este a Biblioteca do IES de Rábade asistiu ás Xornadas das Bibliotecas Escolares que se celebraron en Santiago a fin de semana pasada.
Pero nesta ocasión dunha maneira moi especial, e é que a organización invitou a Lupe Enríquez, a coordinadora da nosa Biblioteca, a participar nunha mesa redonda con outras compañeiras responsables de bibliotecas escolares para contar a nosa experiencia na "Hora de Ler", que por segundo ano consecutivo funciona no noso Centro.
Para deixar constancia, e para que as difrutedes, a seguir ofrecémosvos algunhas fotos.