24/02/21
Manifesto da Asociación de Escritoras e Escritores en Lingua Galega no Día de Rosalía de Castro 2021
Así comeza o Manifesto. Se o queres ler enteiro, entra aquí
23/02/21
Os dous de sempre
Na categoría de alumnado de 4ºESO e Bacharelato do Concurso de Contacontos na Rede organizado polo Equipo de Normalización Lingüística do IES Río Miño resultou vencedor o seguinte traballo de Pablo Rosón, Diego Rodríguez Campo e Pablo Rodríguez Rigueiro a partir dun fragmento d' Os dous de sempre, de Castelao.
22/02/21
O raposo e o lobo
Con este relato, Uxía Moreno obtivo o 1º Premio no Concurso de Contacontos organizado polo Equipo de Normalización Lingüistica do IES Río Miño
Contacontos: Traballo de Noa López Follana
Na categoría de alumnado de 1, 2º e 3º de ESO Concurso de Contacontos na Rede organizado polo Equipo de Normalización Lingüística do IES Río Miño obtivo o 2ºpremio o seguinte traballo de Noa López Follana.
20/02/21
O 19 de febreiro de 1914 nacía nos Vilares (Guitiriz) Xosé María Díaz Castro, poeta
Un paso adiante e outro atrás, Galiza,
e a tea dos teus soños non se move.
A espranza nos teus ollos se esperguiza.
Aran os bois e chove.
19/02/21
Os galardoados no Concurso de Contacontos recollen os seus diplomas
Uxía Moreno e Noa López
Pablo R. Rigueiro, Pablo Rosón e Diego Rodríguez
18/02/21
Premio do Concurso de Contacontos IES RÍO MIÑO
Acaba de fallarse o Concurso de Contacontos a través da Rede, convocado polo Equipo de Normalización e Dinamización Lingüística do IES Río Miño en colaboración co Departamento de Lingua Galega e Literatura.
Desde aquí queremos felicitar ao alumnado clasificado. Nos próximos días iremos publicando neste mesmo blog da Biblioteca os vídeos e audios cos traballos premiados.
No 1º NIVEL (Alumnado de 1º, 2º e 3º ESO) as premiadas foron:
1º PREMIO (50€ en material escolar): UXÍA MORENO FREIRE (3ºB) co conto: "O raposo e o lobo".
2º PREMIO (40€ en material escolar): NOA LÓPEZ FOLLANA (3ºB) polo seu conto.
No 2º NIVEL (Alumnado de 4º ESO e 1º e 2º de Bacharaleto) os premiados foron:
1º PREMIO (50€ en material escolar): PABLO ROSÓN FERNÁNDEZ, DIEGO RODRÍGUEZ CAMPO e PABLO RODRÍGUEZ RIGUEIRO cun relato teatralizado sobre un fragmento da novela de Castelao Os dous de sempre.
16/02/21
12/02/21
Día de Darwin
Cada 12 de febreiro celébrase en todo o mundo o nacemento de Charles Darwin, o científico que cambiou a ciencia e, principalmente, a visión que o ser humano tiña de si mesmo.
04/02/21
03/02/21
02/02/21
01/02/21
Programación teatral de Febreiro
ATENCIÓN ÁS RESTRICIÓNS!
Teatro no Auditorio Gustavo Freire de Lugo. Podes comprar a túa entrada na Oficina Municipal de Turismo ou en https://www.entradaslugo.es/
Convocado pola Real Academia Galega e a Asociación PuntoGal
A participación canalizarase a través dun novo sitio, relatos.gal, que facilitará a entrega dos textos e a cobertura dos formularios requiridos. O prazo para concursar permanecerá aberto do 1 ao 28 de febreiro de 2021. As persoas gañadoras recibirán distintos premios tecnolóxicos –ordenadores, consolas, lectores electrónicos de libros- e relacionados coa lectura. As bases completas e a lista de premios están dispoñibles na páxina web relatos.gal. As historias premiadas serán publicadas nas páxinas das dúas entidades organizadoras e na edición en papel da revista Luzes.
28/01/21
27/01/21
26/01/21
«Memorias dun neno labrego», 60 anos dun «best seller», por Malores Vilavedra
«Eu son Balbino. Un rapaz da aldea. Coma quen di, un ninguén. E ademais, pobre», este quizais sexa un dos comezos máis icónicos da literatura galega, do noso primeiro best seller, que coñece traducións a case vinte idiomas. Memorias dun neno labrego, de Xosé Neira Vilas, cumpriu 60 anos este xaneiro e, aínda que o noso rural dista moito daquel, segue a zumegar a historia do que fomos.
O escritor propúxose contar a vida dun rapaz de aldea nos anos corenta en Galicia. Podería ser a súa, pero non é unha novela autobiográfica, pois non protagonizou as historias de Balbino, pero si son propias a paisaxe, a carestía, as escasas posibilidades de estudo, as tradicións, o traballo arreo no campo, o retrato social... A novela escríbea unha década despois de chegar a Buenos Aires. Como tantos emigrantes, buscou alén mar un futuro mellor e para iso tivo que traballar vendendo teas ou como panadeiro. Nos últimos anos encargábase da contabilidade dunha casa importadora de madeiras e polas tardes apuraba os trámites para ter tempo de sentar nunha cafetería da rúa Cullén e escribir mentres arrefriaba un café que moitas veces nin probaba. O camareiro ourensán non perdía a oportunidade de outear mentres servía a Pepe e este, vendo a súa curiosidade, cando rematou a novela deulla a ler, incluso antes que á súa muller, Anisia. Despois leu aquelas follas soltas Dieste, quen sucumbiu ante a lograda psicoloxía do protagonista, e este pasoulla a Seoane que lle propuxo publicala en Citania, a editorial que fundara en Arxentina.
NOVO ÉXITO NO 2020
Para entón, Neira Vilas xa era un galeguista comprometido na quinta provincia e creara a librería Follas Novas coa intención de distribuír os libros galegos. Non só os vendían, senón que os expuñan en oito vitrinas das asociacións galegas para que estivesen visibles á colectividade en diferentes puntos da cidade e cada oito días mudaban os expositores. Amais da venda de libros, Follas Novas tamén publicaba algúns títulos e, sen dúbida, Memorias dun neno labrego foi o de máis éxito. O escritor non aceptara a invitación de Seoane de publicalo no seu selo, mais si a ilustración para a cuberta.
A historia de Balbino axiña alcanzou notoriedade entre a colectividade emigrante, non en van era a memoria de moitos dos galegos que cruzaran o Atlántico. Tamén chegou a Galicia, onde se distribuíu a través da Editorial Galaxia ata que se publicou en Ediciós do Castro. A día de hoxe converteuse nun clásico das nosas letras, mais tamén nun libro popular querido por milleiros de persoas.
Era o 5 de xaneiro de 1961, Memorias dun neno labrego chegaba como un agasallo temperán de Reis, así o recibimos dende entón, como unha alfaia dun tempo ido, como unha memoria sentimental de moitas xeracións de galegos. Trinta e cinco edicións despois, a novela de Neira Vilas segue a ser o poderoso relato dunha época, non exento de crítica social e dignidade, que mantén o sabor dunha lingua rica, que o escritor lonxe de esquecer na emigración ampliou, como sempre recordaba.
No 2020 foi un dos dez libros máis vendidos da Editorial Galaxia. Xa non podemos escoitar a Pepe contarnos con agarimo as súas vivencias, pero seguimos a prender na súa prosa e ese será sempre o seu éxito, ser un escritor do pobo.
Artigo completo en La Voz de Galicia, aquí
Subscribirse a:
Publicacións (Atom)